التخطي إلى المحتوى

اشعار عادل محسن من اجمل ماكتب الشاعر العراقي
اشعار عادل محسن

اشعار عادل محسن من اجمل ماكتب الشاعر العراقي، نقدم لقراء ” كايرو تايمز” مجموعة من اشعار الشاعر العراقي الجميل عـادل محسن ، حيث يبحث الجميع عن اشعاره ، ودائما ” كايرو تايمز” تقدم لكم الجديد والمفيد.

ونظرا لاهمية الشاعر عـادل محسن واهمية ماكتب وجدنا له مجموعة قصائد شعرية باللهجة الشعبية العراقية وتعتبر من اجمل ماكتب الشاعر العراقي الكبير.

ونقدم لكم هذه المجموعة الشعرية علي امل ان نقوم بدراستها وتقديم نقد ومتابعة لكل قصائدة والان مع القصائد.

ومن المعروف لدي القراء الذين يبحثون عن أشعار الشاعر ان عـادل محسن من كبار شعراء العراق وهو شاعر معاصر يكتب كلمات الأغاني وله مجموعة كبيرة من الأغاني التي تم تلحينها وغناها كبار المطربين بالعراق.

وكان عادل محسن قد عرف علي الساحة الأدبية والفنية بشكل كبير في أواخر التسعينات وتم تكريمه من قبل وزارة الثقافة العراقية وبعض الجهات المعنية بالشعر أيضا.

واليوم نقدم لكم بانوراما كاملة عن بعض نماذج من أشعاره لعلها تروق لكم ونتمني للشاعر الصحة والسلامة.

اشعار عادل محسن

 

 

 

احبـــكــمم

احبك كلمه متفارك لساني

وبعدك ماعشت عمري عساني..

احبكم ما اعيش ابلا هواكم

ويظل محروم كلبي المانساكم

خذتكم قسمتي لنسان ثاني

وبعدكم ماعشت عمري عساني

شفايفكم طبعتوهه على خدي

وعشت عمري بهواكم حلم وردي.

رجعت وحالتي منكم غريبه

بكلب محتار ماحصل نصيبه

وكبل جنت انه المدلل زماني

وبعدكم ماعشت عمري عساني

بدون اعيونكم شلي بحياتي

وبقت بس الصور من ذكرياتي

انتهيت ونزلن عيوني الحزينه

بنفس ذاك الطريق البي مشينه

تركتوني غريب لوحدي اعاني

وبعدكم ماعشت عمري عساني

 

 

 

انا أشتاكيت

 

من شفتك حبيبي العين بالعين دمعتي ودمعتك نزل سوية

رجف كلبي عليك ووكف لحظات واحس وفتني ساعتهة المنية

اذا حبك اذية تعذب الروح صدك اني راضي بهالاذية

انا اشتاكيت ماظل صبر بية واجيك اليوم مو باجر الجية

اجيلك ركض ووصل كبل الاجدام واذا تعبن اجدامي امشي اعله ادية

واذا حنيت الي وذاك الخلك بيك احس بدنيتي ضاكت علية

واذا بيناتنة ابعيدة المسافات على النسمات توصلني الوصية

حبيبي ولوردت وصي الهوى الهاب اشم بيه ريحتك من يمر بية

واذا وحشة عليك اصير باليل عليه الوحشة تبدي من المسية

واذا دمعك علي يترل بالاخدود عليك عيوني طاحن بين ادية

اشعار عادل محسن

اشوفك وين

 

اشوفك وين؟ حبيبي اتوسلك واطلبها منك دين

اشوفك وين؟ يالساعة افراكك جنهة عشر اسنين

اشوفك وين؟ عين الماتشوفك عمية هاي العين

وعين المابجتلك شلي بيها العين

وابوسك وين؟ لو مره اني اشوفك كلي ابوسك وين

عالخدين… ماظن تطفة ناري ابوسة الخدين

ابوس العين… لا يالعين صدكـ انتهي لو صرنة عين بعين

واشمك وين… شعرك لو ركبتك لو من الجفنين

لو من الشفايف لو من الرمشين

لايازين ترة اطباع المفارك مو اطباع الزين

تذكر بالهوى شكد جنة متصافين؟

ما اذكر حبيبي بلحظة انتة بعيد

انت اقرب الي من رمش العين

مايشبهك احد بالعشك والله

اني اوياكبالحب نختلف ياحلو عالباقين

اني وياك مو انسان يهوى انسان

اني وياك واحد منقسم نصين

لو جبنة الحلاوة انتة اجمل الحلوين

ولو جبنة الوفة انتة اغلى الموافين

لا ياعين لتبطلين دمعج مو خسارة يروح عالحلوين… عالغالين

روحي اليوم تخلص حدها هذا اليوم

اخاف انتهي وتندم ياحلو بعدين

اشوفك وين؟

 

يا ذنب الجنيتة

 

يا ذنب الجنية وعني باعدتي وهسة اندارات الدنيا وتندمتي

انتي ام عين باعت عشرتي بلحظات بنفس العين هسة كبالي دمعتي

المواقف تنذكر لمن يصير اعتاب انا شكايل عليج وعني شكلتي

يسألونج عني وكلتي هذا منين وسألوني عليج وكلت صاحبتي

متأمل جروحي الليلة كلهة تطيب وانسى الذكريات ودمعتي وقصتي

ماحن الي كلبج الا هذا اليوم بعد ياجرح يشفة وانتي عاودتي

حرت مابين عن وجهج ادير العين ومابين احضنج واصرخ اتاخرتي

عيني اتحملت واندارت بملكاج ولا جنها اغركت بالدمع لمن رحتي

بس كلبي ضعف واتعاند أوية العين ورضا وسامحج اول ما تعذرتي

 

اجيتك

اجيتك مستحي وبالكوة ادك الباب وعالخدين سالت دمعة مفضوحة

وصلت لباب دارك وتعثرت بالباب كد ماتعبني الجية والروحة

غريب وعندي صعبة هواي طبة الدار وكبل جانت كبل بس الي مسموحة

بجيت وصحت بسمك من ورة الحيطان بكلب مسكور يشبه كسرة اللوحة

حبيبي بداعتي مر عالكلب خطار وبسجين عينك مزق جروحة

العالم تذبح الدمعة بضريج ايام واني بحضرتك دمعاتي مذبوحة

اني الجنت اجيك بضحكة من ابعيد اجيت بطرك دمعة وروحي مجروحة

اجيتك واعتذر واعتب عليك هواي واريد ارجع البيتي اذنوبي ممسوحة

من دونك بلافرحة وكصيرة الايد وأشوف الفرح يمي وايدية متلوحة

حبيبي بعيني اشوفك جاهل زغيرون تتمرجح واني كلبي ايصير مرجوحة

حبيبي معاهدك واحلف كلام الله اليخونك حبيبي ايقشمر بروحة

ساعة وتغيب الشمس

 

ساعة وتغيب الشمس ساعة ويجيني الليل

ويحتاج حيل ودمع ومنين اجيب الحيل

روحي حمامة صفت ابيت اهلي تدور

اشتاقيت لمي انا والخبزة التنور.

بديرة هلي بالطعم يختلف حتى الماي

وحتى الهوى يم هلي يختلف والله اهواي

كل ليلة تسوى العمر لو كعدو اهلي وياي

ومن ايد امي الصبح محلى استكان الجاي

يامنطقتنة حلم ارجع الاصحابي.

وكل ساعة صاحب يجي ويدك على بابي

محتاج محبوبتي الحلوة ام جفن غافي

واتمنة هسة تجي وتغفة على جتافي

مشتاق للمدرسة والجرس والساحة

اطفال نركض ركض بس نشعر براحة

اشما دار بية الزمن ابقى الهلي ميال

ومنين احصل كلب يتحمل الترحال

تعـــــــــــال

اشعار عادل محسن

تعال اصفي البينك وبيني وبعد ارجوك لتحاول تجيني

اذا اطلبك امسامح.كلشي ماريد واذا مطلوب الك جيت ا فك ديني

اذا مرك سهر وسهرت فد يوم انا سهران الك كل عمري وسنيني

واذا مرك دمع وبجيت فد يوم دموعك ردت بيهن تشتريني

جنت قاسي بمحبتك حيل وياي وعلى اصغر مواقف تبجيني

وجنت ملهوف اجيك ودمعتي اتسيل وجنت مرتاح تضحك تلتقيني

تعال وكل طرف يحجي اليريدة ونمحي اثار حبنة ومانعيدة

ماأندم على ماكان رايح انا اخسرتك بس صدك اني رابح

واذا متباهي انك عني صديت صدك باجر مدنك تجيني

الذنب ذنبي

الذنب ذنبي اكشفتلك نقطة ضعفي ودليتك عليهن وحدة وحدة

وانا الكادر اظم وكادر اخفي بس ظنيت احنة بروح وحدة

الايد اللي اوجعتني انطيتها لك استفيد بغلطتي وأوجع بشدة

احبك حب جبير وهذا ذنبي واليبحني واحبة بروحي اسعدة

وأنت بأصعب اللحظات اجيتك نكرت وجوهنة وبابك تسدة

حبيبك يبقى الاول لا تجافيه ودموعك لمها لم وابجيها عندة

حبيبك لو لو غلطت وياه راضيه ترجع بالفشل من تهوى بعدة

وين العشرة ذيج ودمعة العين وين احلامنة ووين المودة

ليش اللتحبة وتقسي وياه يجيك امدنك وينطيك خدة

ومن ايشوف ضعفك شوكة يمطيك بدل ميبوسك وينطيك وردة

كل شي ينباع

 

كل شي بهل الزمن ينشري وينباع عدا نبض الكلوب ودمعة العين

بأموالك تحصل راحة البال بس ماتنجمع بالمال كلبين

الحب يعني تذوب الروح بالروح الورد ةلا مايورد الا بالطين

الذهب يلمع بريقة ويسحر الناس بس عمرة الذهب مابجة العيون

وحيبيبك من يغب عليك لحظات عقلك ينتهي ويصيبك اجنون

يصب دمعك على الخد مثل الاطفال وتظل تناطر اليرحون ويجون

نملك مال بس اغلى امن الاموال حبايب ساعة الشدة يوافون

رصيد الحب جبير وماخلص فديوم بس كلمة حبيبي اتعادل الكون

 

قصيدة :

اخر خبــــــــــر

سمعت اخر خبر عنك سمعتة كشفت اسرار حبنة وكلشي كلتة

جنث خايف عليهة اسرارنة اتضيع وتطلع مني مو منك انتة

جنت كد ما أهابك تحجي وياي وأحاجيك بدمع ولساني سكتة

فوك الجمر جيتك حافي الاجدام ومن ردت اوصلك بيدك شعلتة

عذولي الجان يحلم يحجي وياي علو صوتة يسمعني ضحكتة

فرحان ابتسم للرايح وجاي ويبشر الناس كلهة بعيني شفتة

ما نادم بس على تعبي وياك يهد الحيل يا تعبي التعبتة

 

قصيدة :عتــــــاب

ظل عاتب الى ان تشبع اعتاب عتابك فوك راسي ويبقى مسموع

سكتنة وبطلت كل المواضيع عدا حبك حبيبي شعدنة موضوع

اذا هذا انتة يمي ودمعتي اتسيل اشلون اكدر افارك وجهك اسبوع

وأبقى انضر الي من القدم للراس وشوف بيا جزء مني انتة مزروع

واحزر لي مكانك وين ماوين بهداب الجفن لو بين الدموع

مكانك لا بهاي ولا بهاي مكانك يا حبيبي بنص الاضلوع

 

قصيدة :الاب

 

جنة ازعار نكعد وكت الغرورب اباب الدار ننطر جية ابونة

يرجع مبتسم بس وجهة متعوب ومن ايوشفنة يضحكن اعيونة

يجي امحمل اشكال والوان وتظل اتلوم بيع امنة الحنونة

تعبك هذا تعبك لا يابو فلان تتعب والجهال ايضيعونة

لكن يبتسم ودموعة بالعين ويكل لمي التعب يستاهلونة

هذولة احزام ضهري بساعة الضيج والج بشدة يام فلان عونة

ابونة اعلى جتافة صغار وكبار لعبنة اسنين ماتعبن امتونة

يلبسنة حرير وهو محروم وقميصة امن التعب مكلوب لونة

واذكر لو لعبنة الوالدة اتصيح ابوكم نايم لتفززونة

الحد هاليوم صدك منك انخاف ونجل اسمك يوالدنة ونصونة

يا هنيالة اليسعدك واليرضيك ابرضاك الجنة ندخلها يا ابونة

ابونة بدنيتة مايوم مرتاح الدنية اوياه صعبة ومايملها

تعب جاع وعطش ما دنك راس ولا رخص ركبنتة ومرة ذلها

اصلب رجل بينة بمحنتة ايصير وكل صعبة التمر بيده يحلها

بس اضعف رجل بالعائلة ايصير اذا امي المرض مرة وصلها

امي اشكد تحبة اشكد تداريه امدللها الجبير وهو خلها

بس لو عضب مرة ولمي اندار ترجف خوق من ايباوع الها

ابونة امن المصايب يحمل اشكال ولا يحمل عتب امي وزعلها

عندة المهم يتعب واحنة نرتاح وابد منية اجد ماحملهت

علمنة الولد عون اهله بالضيج ومحبة اهلك ترة اتموت الاجلها

وجيرانك اعز من احتك اصير واغلى من نظر عينك خجلها

يرجع ظهرة منجي وجدمة تعبان وتتلكاه امي ويضحك الها

وكبل مانوصلة وتسلم اعليه الله يساعدج هو يكلها

رقيق وكلبة دافي طبعة محبوب ابونة ايغرك العالم حنانة

مايرتاح كلبة وعيونة متنام اذا منام كل واحد بمكانة

واذا لحظة انتاخر خارج البيت يقلق والدي ويطلع ورانة

وتولمة الوالدة وتردية يرتاح ويكلها ابركبتي ذولة امانة

تجي لحظات يصبح قاسي الاطباع وندري القسوة من حرصة علينة

دنيانة بحر واحنة ابوسط روج سفينة وهو ربان السفينة

يعاقبنة اعلى غلطة ويقسي مرات ولاجنة ابو الروح الحنينة

وبعد لحظات لو منة الزعل راح يجي ندمان ويبوس بدينة

الله موصي بيه باقدس اكتاب بالقران وامي وياه جعلها

يا رضا الله ورضا الوالديم وميزات الابو عونة الحملها

تقي ويخاف ربة بيوم الاحساب ويحمده على اللكمة الاكلها

احتضن امه وابوه اسنين وسنين وجفوفة شمع ضواها كلها

نظل نعلك العشرة الوالدي اشموع مثل ما لهلة كل عمرة شعلها

تلك كانت رحلة ممتعة مع بعض اشعار الشاعر العراقي عـادل محسن ولدينا الكثير سننشرها لكم علي مراحل ، مع خالص امنياتنا ودعواتنا للشاعر بالشفاء العاجل ان شاء الله.

استطاع الشاعر العراقي الكبير عادل محسن أن يصنع لنفسه قاموس خاص ومفردات خاصة به ، فأصبحت أشعاره يحفظها الجميع ويطلبها الجميع وذلك مايؤكد نجاح أي شاعر يريد ان يصل الي عامة الناس، فكل التحية له ولأشعاره التي ستظل تحفظ اسمه وتكتبه باحرف من نور في تاريخ الشعر العراقي والعربي ابد الدهر .

قد يهمك أيضا:

الشاعر العراقي عـادل محسن ويكيبيديا  في البرواز

التعليقات

اترك تعليقاً