كل فترة…أموتلي حبه.. شعر: مسعودة جادالله
كل فتره…أموتلي حبه
أغيب شويه عن الوجود …
أٓفصل حياه
مره مُت
وعنيا لسه مغمضه
شوفت السحابه
واقفه بتغسٍل حنين
وف عز كفنه ….قام ابتسم
مادد إيديه
اللي طارح بين صوابعه فيها ضي
ونجوم بتخرج من جبينه
ألقى الظلام حواليا نور
بس فوقني القمر
نٓده الحياه
مره تانيه لما مُت
كانت عنيا مفتحه
شايفه الولاد والبيت
ومش حاسه بوجودهم
باصه ناحيتهم مجرد إتجاه
شايفاني بجري بمريله للمدرسه
وضفيره طولي
بتسابقني
وشنطه حلوه من قماش المريله
وسوسته ب جناح
عٓمْال يغازل والصوابع طايره بيه
يشدني فوق
نبعد عن سطوح الحوش
واضحك مع طيور النشيد
يحضني موج الضباب
المحلق ع الوجوه
الغيوم
فتحت عيونها للقمر
وٓصل الحياه
عٍيشت فتره طويله تانيه
إشتاقت للموت الطليق
مُت تاني
وخدت بوسه من القدر
صحى الحنين
فٓك الكفن
جمْع ورود كل الجناين
بين إيديه
وضٓحك الفل ف عنيه
عزف سلو
طلب النجوم ترقص معاه
السحاب
راق وقتها….رقص كمان
رقْص كمان…..وتره حزين
بدِل الليل بالشعاع
يختفي ضي القمر
تظهر حياه
ألوٍن جناحات الفراش
بالقوس قزح
ألقى الفضا واسع…براح
ملكوت بريش أبيض
ونور
أفرد جناحي معاه
أطير.
___________
مسعودة جادالله_من ديوان _عصافيرالجنه_ام فيونكة
