سمعت كتير ولا سمعنى غير الجدران
ووقت اشرب حنين وامان
وبالاحزان بكون فطران
ولد خايف من التأويل.
الكلمات دى من ديوان الشاعر الجميل احمد محمد عبد القوى” انا بس طير” وصف نفسه فى قصيدته امل ضجران بانه ولد خايف من التاويل مع انه فى الحقيقة ولد شاعر باحساس صادق وذوق عالى وفن اصيل وكمان فى قصيدته بالاحضان بيقول
بسقسق فى المرار احزان
واصب الهم فى الخزان
طبعا جمل جديدة ومفردات خاصة به تنم عن تجربة صادقةوفى قصيدة انا مش امل بيقول
حبة امل جوا الالم
قلب اتقتل بسيوف وطن
انا مش امل
انا مش هدف
انا بس طير
كلمات جميلة واحساس راق ومش بس كدة ..ده كمان متمسك بالفن الاصيل والتراث المصرى الرفيع يقول فى قصيدة فنجانى
فنجانى
وصوت فيروز ينسينا
فيمضى العمر فى ثوانى
ولما حليم يقول جلست
تروحى وتقرى فنجانى
اما لما حب يوصف حالة الشباب فى زمنه قال فى قصيدة شباب فاشلين
الموت شباب عايشين
فى الكون بدون الروح
الموت شباب تايهين
والحلم كله جروح
انا وانت وتانيين
املنا صار مدبوح
سامعين وااه ساكتين
والكل سمعنا
كلمة شباب فاشلين
كلمة بدون معنى
وانا احييك يا احمد على رفضك للاراء المحبطة وتحمسك للشباب ودعوته للطموع فى التغيير.
واختم بسطور من قصيدته الام
قلمى الرصاص انكسر
وانا برسم الافراح
انا مين يداوى الجرح اللى فى قلبى العفى
واعيش معاه مرتاح.
دعوة ايضا للتسامى على الجروح والامل فى الحياة المزهرة.
طيب ده مين بقى ..ده ابن الشاعر الصديق نقيب الكتاب بالمنيا محمد عبد القوى حسن .
لقد اصر احمد ان يخرج من جلباب ابيه ويكون له لونه وابداعه الخاص به الذى يعبر عن جيل جديد طموح وهذا لا يمنع ان يكون الاب قد غرس فيه بدون قصد منهما شجرة الشعر وقد انبتت احلى الثمار
بالتوفيق ابننا الغالى احمد وعقبال الديوان العاشر وعضوية اتحاد الكتاب.
قد يهمك: ندوة عن اهمية سيناء جغرافيا بالنقابة الفرعية لاتحاد الكتاب بالمنيا
التعليقات