إلى الصديق الاعلامي .. إبراهيم العسيلي الحال اتغير يا ” عسيلي ” ما بقاش طيب

إلى الصديق الاعلامي .. إبراهيم العسيلي
الحال اتغير يا ” عسيلي ” ما بقاش طيب
—
بكاني سؤاله المتكتف بحبال الآه
ولقيته معبي بدمعاته والحزن ملاه
والقول منه ..
أنا عايزك تكتب وتفضفض
عن صاحب القلب اللي بيعطي
ولا يبخل أبدا ولا يشكي
وبيفتح بابه ولا يردش يوم حد نداه
كان زي النخله الطراحه بالنور والخير
ولا همه في يوم إنه بينزف شمعته للغير
كان قلبه كبير .. مليان بصباح
ولا عمره يشيل كره في نفسه
كان يعلن دائما عن حبه
كان حد جميل / الحال في زمان
لكن زعلان من فعل الناس
إيه فعل الناس.. والقول مني ..
كان يصحى الصبح يصبحهم ..
بضياه يصحوا
والنور بيشأشأ في عيونهم
وصباح الخير يعلا بروحهم
الحال اتغير يا ” عسيلي “مابقاش طيب
واللي بتحميه يوم في عيونك بيحط عليك
وبينسى إيديك إللي تطبطب
ويدوس على زرعك وبيدهس
بكاني سؤالك يا ” عسيلي” ..
ولقيته معبي بدمعاتك والحزن ملاه
—

بقلم الشاعر: نبيل مصيلحي