أنا نُصين ..
نُص بيسلم عليك
نُص رافض يشوف الدنيا
إلا بعينيك .
ف البداية كنت عايش ،
كائن حي ..
شبه كل الناس
ليَّ نفس الملامح
نفس الجروح ،
هيَّ هيَّ شكوتي م البعد
مِنْ قلة الحنان
مِنْ العشق الجعَّان ..
هيَّ هيَّ دمعتي بلون الموت ..
تكشيرة الوشّ المشقق
مِنْ تعاريج العَجزْ ..
لهفة المجنون لرجوع عقله تاني .
ف لمح البصر ..
مِنْ غير حتى ما افتكر
إمتى اتحولت ..
لقتني بَغيَّر هدومي ،
بَغيَّر شكلي
أحلق شعري
حتى عطري الملازمني طول العمر ..
غَيَّرتُه ،
زي ما غَيَّرتْ مشيتي
ألوان ماكانتش في قاموسي .
ضحكتي بقت نونو ..
والكلام يطلع يبص على وشِّك
كأنه بينعس ع الشفايف .
أنا بقيت نُصين
نُص قديم
مُش فاكر منه حاجه
نُص جديد
أخر حبشتكا وأخر أناجه .
القلب لسه ف لفِّة النونو ،
نبضه الضعيف بيتشعبط ف الحياه .
عيونه كما عصفور ..
بيزقزق للصبح يصحى .
خبطته على باب الليل متشوقه
لقلب يشبهه متخفي ..
ف قلب الورد ..
بخصوص قلبي برضو ،
لما يحب ..
يعشق بجدعنه .
أنا نُصين ..
نُص باصص ف السما
نُص عاشق للدفا
مِشَرَّع الجناحين .
ــــــــــــــــــــــــــــــــــــــــــــــ
عاشور الزعيم
الداخله يناير ٢٠٢٥
التعليقات